السلام عليكم و رحمة الله و بركاته
موقع بسمة لكل ما يهم المرأة العربية يقدم جبت لكم تصاور الخطوبة كيف واعدتكم
جبت لكم تصاور الخطوبة كيف واعدتكم
موضوع للاخت ريميتا
حبيباتي كيف الأحوال؟؟ يا ربي تكونو في أحسن أحوالكن اللهم آمييييييييييين
كيفما عدي تشوفو جبت تصاور الخطوبة كيف واعدتكم يالاه دخلو مرحبا بكم
نحكي لكم القصة بالأول، المهم بعدما دوزنا اللقاء الأول شوفو
الرابط
ماما أصرت على عمل حفل
الخطوبة بحيت يحضرو فيه غير المقربين من العائلة يعني خوالي و عمامي و المقربين للعريس و هاكدا يكون إشهار للزواج قدام الناس و الجيران
فداك الشيء اللي كان اتفقنا و حددنا التاريخ و بدينا فعلا التحضيرات، كنا دايرين نبداو الحفل في العشية نفرقو les soirés مع العصير ثم أتاي و الحلويات طبعا مع l’animation و بالفعل اتفقنا مع ديدجي باش نشطو حنا العيالات و البنات بيناتنا و يكون داك الجو د الأضواء و الدخان طالع إوا و من بعد نحطو القهوة مع المالح و الحلو يعني سيكار معمر بالكاشير و الفرماج يتقلى في ساعتو و يتقدم و بسيطلات بالدجاج و رغيفات معسلين و مسيمنات و كرواصة غي صغيورة و في الليل يجيو الرجال نحطو العشاء و يكون تركاب الخواتم…
بدينا بالحلويات و بالضبط صايبنا الصابلي و بدينا كعب غزال و صايبنا داك السيكار حطيناه في الكويجيلاتور و حنا عاد غنكملو حلويات اللوز كانت الصاعقة في الصباح بكري خبر وفاة جدتي الله يرحمها و يوسع عليها اللهم آمييييييييين هي و جميع موتى المسلمين
حكيت لكم و تفكرتها و جاوني الدموع الله يرحمها
المهم لغينا كلشي حتى دوزنا الأربعين و كانو شي خواتات العريس بعادين جاو قالو بغينا نشوفو العروسة و نحضرو معاكم و حنا بحكم داك الشي اللي وقع كانو اللي بعادين من العائلة حتى اللي خارج المغرب حاضرين فكلشي قالو دوزو عليكم هاد الشي واخا ماما كانت في حالة سيئة جدآآ
فقررنا تكون ليلة نجمعو فيها الأحباب بحال شي صويدقة الرجال كانو التحت كيقراو القرآن و العيالات في الفوقي
قبل بنهار أو يوماين جبنا العدول للدار دارو العقد إوا هاد الشي اللي كان و نخليكم مع الصور
هادو les sablés اللي وجدنا مع كعب غزال
