السلام عليكم و رحمة الله و بركاته
موقع بسمة لكل ما يهم المرأة المغربية يقدم كيكة بفلان الشكلاط و مسقية بالكراميل
كيكة بفلان الشكلاط و مسقية بالكراميل
من الاخت فرح و مرح جزاها الله عنا كل خير
اهلا حبيباتي كيكة اليوم خاصها قصيدة باش نوصف لذتها كانت صاوباتها لينا ماما رقم 2 خديجة كانت عملاتها لينا في رمضان اوا ما نعاودش ليكم كي كاتحط كاطير لانها فعلا لا تقاوم البارح طاحت لي فبالي وعيطت خديت المقادير واليوم صبحت عليها وبغيت غا فوقاش نكمل وتوجد باش نتلذذ ههههه وراني تلذذت مزيان وطلعت فوق السحاب وهبطت نبارطاجي معاكم
مقادير كيكة بفلان الشكلاط و مسقية بالكراميل
4 بيضات
كاس سكر سنيدة
كاس ماعامرش زيت
دانون ڤاني
فلان شوكولا (79غرام)
معلقة كبيرة كاكاو
خميرة الحلوة (15غرام)
2 كيسان دقيق
كيف ماجرات العادة نطربو البيض والسنيدة هما الاولين
من بعد نزيد دانون والزيت
وفلان شوكولا والكاكاو
وفي الاخير الخميرة د الحلوى والدقيق
وفي التالي نعملهم في المول والى الفرن لي مسخن على 200 درجة مدة نصف ساعة تقريبا
على مايطيب الكيك نوجد الكاراميل غانحتاج
كاس سنيدة
معلقة كبيرة زبدة
دانون ڤاني
كاندير الزبدة والسنيدة في كاسرونة ونديرهم فوق عافية مهيلة بلا مانحرك ماوالو راه الخليط بوحدو غا يتكاراميليزا
هاكيف ولا
نطفي عليه ونضيف ليه دانون ونحرك مزيا ا ا ا ا ان
هنا الكيك مني طاب
نحيدو من المول ونخوي فوقو الكاراميل كامل وخا يكون فائض ماشي مشكل لانه غايشرب
انا زدت حبيبات الشكلاط هادا كان اختياري لامابغيتوش خليوه غي بالكاراميل
يالاه لي بغات ذوق تهز صبعها هههه
