السلام عليكم و رحمة الله و بركاته
موقع بسمة لكل ما يهم المرأة المغربية يقدم هدية حقيقية لكل اخت تكره عجن الخبز
هدية حقيقية لكل اخت تكره عجن الخبز
من الاخت روح الايمان جزاها الله عنا كل خير
الغزالات ديالي اليوم عندي ليكم مفاجئة
فالحقيقة حنا النساء عندنا قواسم مشتركة عديدة منها الكره المفرط لعجن الخبز
أنا شخصيا من النساء الي أكتر حاجة كيكرهوها فالعمل المنزلي هو عجينة الخبز ولكن اليوم و الحمد لله
مابقيتش كنهزلها الهم
و بغيت الاخوات كولهوم ما يبقاوش هازين ليها الهم و هادي هي المفاجئة ابتداء من اليوم شعارنا غيولي هو
الخبز الساخن في منزلي كل يوم
زوين هاد الشعار ياك هههه
بلا ما نزيد نطول عليكم
هاد الطريقة فالعجين خديتها من مبدأ عجينة العشر دقائق
نبداو على بركة الله
كناخدو الدقيق الي كنستعملوه فالعجن أنا غانعطيكوم المقادير ديالي و نتوم لكم كامل الحرية فالمقادير و الكمية
كناخد 2 زلافات ديال الماء الدافئ كنديرهوم فمولينكس و كنضيف ليها الخميرة ديال الخبز + ملعقة سكر كبيرة + الملح +زلافة ديال الفورص + زلافة
ديال الفينو ولكن مايكونوش عاااااااااااامرة بزاف
كنخلط الكل جيدا حتى يولي بحال عجينة البغرير
و نخليه يرتاح 10 دقائق أو أكتر فالحقيقة حسب العمل الي كنكون كنعملو فنفس الوقت هادشي علاش هاد الطريقة
ديال العجن زوينة حيت ممكن نقوم بأعمال أخرى فنفس الوقت
و هاهي من بعد ما رتاح
من بعد كنصب الخليط فالقصعة
كنضيف باقي الدقيق حتى تجمع لينا العجينة
ولكن لازم العجينة ما تكونش قاسحة يعني خاسها تبقى مرخوفة شوية و نخدموها بيدينا بالطريقة العادية فقط شي 3 ديال الدقائق
و نغطيوها و نخليوها تخمر و نمشيو نديرو شي شغال آخر هههه
من بعد ما تخمر كنلولبو العجين
و نكرصوها
و نخليوها تعاود تخمر من بعد نخبزوها
و ها الخبيز ديالنا واجدا بلا دليك بلا تمارة بالاضافة إلى أننا كملنا حتا الشقا العادي ديال الدار فنفس الوقت
ايوا قولولي كيف جاوكم هاد الخبيزات
عندي ليكم واحد التوضيح أكيد أنكم لاحضتو أن الدخليط الي فمولينكس لون ديالو مائل للبني
السبب هو أنني كترت فيه الدقيق الكامل منين تكونو تانتوما عاملين الدقيق الكامل بكترة يعني كتر من الفورص و الفينو حاولو تخليو العجين
مرخوفة شوية حيت الدقيق الكامل كيشرب شوية أما الي كيستعمل غير الفورص و الفنو الخبيز ديالو كتجي كتشهي بزاف
دعواتكم لي بالشفاء العاجل لأختي المريضة بالمستشفى وأرجو أن تكون نابعة من القلب
لأن الدعوة في ظهر الغيب مستجابة
اشتريت خبز صغير لونه أصفر مفشفش وطري بزاف وملوي في رشة سميد الا عندك الوصفة ديرهالنا ربي يحفظك