السلام عليكم و رحمة الله و بركاته
موقع بسمة لكل ما يهم المرأة المغربية يقدم كيك ورود التفاح
مقادير و طريقة تحضير كيك ورود التفاح
من الاخت ام اسامة و ايمان جزاها الله عنا كل خير
السلام عليكم ورحمة الله وبركاته
أتمناكم جميعا بألف خير
وصفتي اليوم كيك ورود التفاح رائعة وخفيفة ومندية إن شاء الله تجربوها وتعجبكم
نتوكل على الله
مقادير كيك ورود التفاح
2 بيضات + 150 غ سكر لي مكيبغيش الحلاوة ممكن ينقص شوية + 150 غ كريم سائل + 100 غ زبدة + 200 غ دقيق + 1 فاني + 2 خمارات + قبيصة صغيرة ملح + 3 تفاحات أو حسب المتوفر
نسخن الكريم والزبدة على نار مهيلة حتى تدوب الزبدة ونخفق البيض والسكر حتى يدوب السكر مزيان ونبدا نضيف خليط الكريم والزبدة شوية بشوية مع الخفق المستمر ثم نقص من السرعة ونبدا نضيف الدقيق مع الخمارة وقبيصة الملح
نخوي الخليط في مول مدهون بالزبدة ومرشوش بالدقيق أو مفرش بورق السولفيريزي
قطعت التفاح بهاد الطريقة وشكلت منو وريدات وغطستهم فالعجين وزدت فتحتهم شوية
وعملت شرائح التفاح فالجناب ورشيت كمية من السكر البني على الوجه ودخلتها لفرن مسخن من قبل على 150 درجة
كتجي غزالة بزاف ومندية والتفاح كيطيب مزيان حيت مقطع رقيق
نتمنى تجربوها وتنال إعجابكم
لا تنسوني من صالح دعائكم ولكم بالمثل بحول الله
