السفة المدفونة بالدجاج
مقادير و طريقة تحضير السفة المدفونة بالدجاج
كنشبرو نصف كيلو شعرية السفة و كندهنوها بالزيت كاملة ونعملوها تتبخر شئ عشرين دقيقة
كانزولوها ونعملوها فشي قصعة ونكبو عليها الماء بارد كانخليوها شئ اربعة الدقايق ومن بعد نصفيوها ونرجعوها الكسكاس تتبخر للمرة الثانية
و من بعد نزولوها ونرشو عليها شوية د الملح و نبقاو نكبو عليها الماء طايب بشوية شوية وحنا كانقلبوها نردوها المرةالثالثة ونكونو عملنا شوية دالزبيب مغسول فقاع الكسكاس ونخليوها شئ ربع ساعة
نزولوها ونرشوها بالماء طايب فحال المرة التانية و نزيدو عليها جوج معالق زبدة و جوج معالق سكر جلاصي و جوج معالق د الحليب غبرة نيدو كيعطيها واحد المذاق مزيون
ومن بعد نقلبوها مزيان ب الفرشيطات حتى تذوب الزبدة و يتخلط كلشي مزيان نردوها نالكسكاس للمرة الأخيرة عند التقديم
منبعد نخويوها فالقصعة و نفكوها من بعضها بالفرشيط
ونقدموها مع الدجاج مدفونة ولا عادية.انا كانعمل مدفونة بريستيج كانجيب الطبسيل الي عنقدمو فيه ونعملو شئ كادر دائري ولا مربع الشكل الي بغيتو نخويو نصف الشعرية ونعاوطوها مزيان ونخويو الدجاج ونعوطوه
وفالاخير نزيدو الشعرية الي بقات ونزينها حسب الذوق باللوز والقرفة والسكر كلاصي و البيض
مقادير الدجاج
واحد دجاجة مقطعة كانعملوها طيب مع واحد البصلة شوية دالقصبور والمعدنوس مقطعين و3 ضريسات د الثوم ملح ابزار سكنجبير خرقوم قرفة شوية د السمن والزيت
كنشحروهم شوية ونضيفو عليهم شئ خمسة بصلات تقريبًا شئ 2 كيلو مقطعة شرائح طويلة ونخليوهم يطيبو أنا كايطيبولي الدجاج غير فالماء الي كيطلق البصل ادا بغيتو زيدو شوية دالماء على حسب
و ملي كيطيب الدجاج كانحيدوه من الطنجرة ونخليواه يبرد من بعد نفتتوه فحال الدجاج دالبسطيلة والبصل كنزيد عليها واحد معلقة 🥄 د السكر (اختياري اذا بغيتو يجي الدجاج فيه الحلاوة شوية ) و كانخليوها تتشحر مزياان وملي تتعسل نطفيولا ونزيدو عليها دك الدجاج و هو لي كنعملو وسط السفة
ذ
وهذا هو الشكل النهائي ل السفة المدفونة بالدجاج
