تقلية العيد الكبير بلا بصلة بلا مطيشة بنينة و لذيذة
تقلية العيد الكبير بلا بصلة بلا مطيشة
سلام لبنات نتمنى تكونو بألف خير اليوم بغيت نتقاسم معاكم طريقتي فالتقلية أنا كتعجبني هاد الطريقة ديال ناس زمان كتجي واعرة بزاف 😋😋
المرحلة الأولى:
نغسل الدوارة مزياان ونقطعها ونوضعها فكوكوت منديرو معاها والو ونغطيو عليها ونديرو نار مهيلة ونخليوها تطلق الماء لفيها راه كيكون ماء كحل ونصفيوها ورجعوها الكوكوت ونعاودو نفس العملية ونصفيوها ونغسلوها بالماء دافي ورجعوها الكوكوت. هاد الطريقة مكتبقاش الزفورة
المرحلة التانية:
نضيف عليها قزبور 5 فصوص ثوم لب حامض مصير تقريبا ربع حامضة مصيرة ملعقة صغيرة سكنجبير خرقوم تحميرة قزبور يابس نص ملعقة ابزار كمون سودانية شوية ملح نصف كاس زيت زيتون ونخلط كلشي مزيان
ونقليه غير شوية ونضيف قطع اللحم اختيارية كتجيو غزالين مع التقلية ونضيف الماء الكافي من الاحسن يكون ساخن ونقفلو عليها الكوكوت ملي طيب ندوقو الملح ونخليوها تقلى ومرة مرة نحركوها حتى توقف فيها الزويتة
ونقدموها صدقوني كتجي واعرة بزاف
