حلوة ريشبوند 😋محبوبة الجماهير كتجي هشيشة كذوب فالفم
اكثر من رائعة 👌
ايه شحال كانت كديرها لينا ماما فاش كنا صغار كانت كتخبي سطل نوضو بليل نبقاو نقلبو حتى كنساليوها ليها 😂 كانت يمات جميلة جدا
هاد الحلوة خديت المقادير من عند ماما او درتها صدقت روعة ❤
مقادير حلوة ريشبوند بالزيت :
المكونات 4بيضات + 2 كيسان ديال الزيت + 2 كيسان ديال السكر + العبار بكأس العنبة + قبصة ملح + 2 خمارات + قشور حامضة + فانيلا + او دقيق حسب الخليط
للتزين
مربى المشمش + كأس عصير البرتقال أو كأس ماء الزهر + الكوك
طريقة تحضير حلوة ريشبوند بالزيت :
في قصعة كنخدمو البيض مع السكر قبصة ملح فانيلا مزيان او نضيفو الزيت او حنا كنخلطو او نبداو نديرو شوية الدقيق مع الخمارات يكونو مغربلين كنخلطو عاد نزيدو ما تبقى من الدقيق حتى تولي عندنا عجينة رطبة أو منقصحوهاش نبداو نديرو كويرات شوية صغار حيت مزال غادي يتنفخو في الفران نوضعوهم فلاطة مدهونة بالزيت او مفرشة بورق الزبدة ندخلوها الفران نخليوهم حتى يطيبو نردو معاهم البال باش ميتحرقوش لينا
من بعد ما طيبناهم كنزينهوم بخليط مربى المشمش مع كأس عصير البرتقال
في كصرونة كنخلط مربى مشمش مع عصير البرتقال او نديرهم على نار يطبخو شوية صافي او نطفي او نبدا ندير واحد الكمية ديال الكورات نخليهم شوية حتى يتشربو مزيان صافي نحيدهم او نفندهم في الكوك
