طريقة تحضير الفقاص الخامر
مقادير الفقاص الخامر :
500 غ الدقيق 100 غ زبداة مذابة ربع كاس سنيدة/ سكر خشن نصف ملعقة صغيرة ملح ملعقة صغيرة بودرة الفاني/الفانيلا ملعقة صغيرة خميرة فورية وخمارة و250 مل حليب ممكن اقل او اكثر حسب نوعية الدقيق وبيضة
طريقة تحضير الفقاص الخامر :
في اناء درت الدقيق السكر الفاني الملح الخميرة الخمارة وضفت الزبدة رملت الخليط جيدا من بعد ظفت البيضة وبقيت كنزيد فالحليب بالتدريج انا كفاني 200 مل مهم الحليب ضيفوه بالتدريج
خاص العجينة تكون عادية ما كتلصق ما قاصحة دلكتها شوية وغطيتها نصف ساعة تخمر
فهاذ الاثناء خديت 100 غ السنيدة وملعقة صغيرة القرفة خلطتهم مع بعضهم وحطيت الخليط على جنب
منين خمرات العجين قسمت العجين ل 3 كريات
كنطلق كل كرة بالمدلك على شكل مربع وكناخد خليط السكر والقرفة لي قسمتو حتى هو باش كل كرة ندير فيها هاذ الخليط كنرشو فوق العجين بشكل متساوي وكنبقى نرولي على شكل شنيك حتى كنوصل للطرف وكنسد العجين مزيان باش ما تحلش فالفرن
كملت العجين لي بقى بنفس الكيفية وكنحط الباكيط فوق ورق الطبخ لي ضروري وكنحطهم يخمرو تاني ربع ساعة
فهاذ الاثناء سخنت الفرن شوية ودرجة الحرارة منخفضة باش يطيب بشوية وغير من التحت حتى طاب وتحمر من التحت شعلت الفوق تحمر وخرجتو
غطيتو تقريبا ساعتين عاد بديت نقطع فيه
صراحة كيجي طوب ومورق هو تقطاع ديالو كيجي صغير ماشي بحال الفقاص العادي لي كنقطعوه بالميل
ستفتو فالاطة ودخلتو للفرن ساخن شاعلة غير الفوق حتى تحمر من الوجه وقلبتو وخرجتو بالصحة والراحة
*ملاحظة :
١_هاذ الفقاص ما كيجيش حلو بزاف
٢-راه باش كيكون فالفران ديك السنيدة كتولي معسلة من التحت ما تخافو من والو غير تكونو مفرشين ورق الطبخ ومنين يطيب فالاول ونخرجوه باش نغطيوه حيدوه من داك الورق لي طاب فيه حيث السكر كيخرج
