مقادير و طريقة تحضير اللحم مشوي فالكوكوط :
كناخذو اللحم من المجمد مباشرة نديروه فالكوكوت نزيدو معاه ملح وكمون فقط ونديروه على نار مهيلة مدة ساعة ممكن أكثر ممكن أقل ، و مرة مرة نحرك الكوكوت حتى نحسو بيه طاب ونطفيو عليه ونخليوه شي ربع ساعة حتى يرجع عليه غير البخار ديالو عاد نحلو عليه.
مقادير و طريقة تحضير الارز :
بالنسبة للأرز كناخذو بصلة محكوكة نشحروها مع ملعقة كبيرة من الزبدة و 3 ملاعق من زيت الزيتون في نفس الطنجرة لي طيبنا فيها اللحم نزيدو عليها إبزار و اسكنجبير و الخرقوم عرق حبات قعقلا(الهيل) عود قرفة و ملح و حبة من الفلفل الأخضر مقطعة مربعات ونفرغو عليهم الروز لي غسلناه من قبل و نزيدو الماء للتمراق ونسدو عليه على نار هادية مدة 15 دقيقة من بعد ما تصفر الكوكوط من بعد نطفيو النار ونخليوه 10 دقايق عاد نحلو عليه كنقدموه مع اللحم
