مقادير شباكية مقرمشة و معلكة
كاين شي شباكية كاين شي توجاد لرمضان و لا والو؟؟
الله يدخل علينا هاد الشهر بالصحة و السلامة، و بالخير و الرزق و التيسير يا رب.
انا منين تنصاوب الشباكية تنحس انا صافي ساليت توجاد لانها اكثر حاجة كانعكز عليها 😂
هادي راها ميني شباكية فيها 2 لقمات صافي 😋 و كتجي مقرمشة و معلكة و فيها الفقاعا ت راني بينتهوملكوم فالصور 😊
مقادير شباكية مقرمشة و معلكة :
1كلغ دقيق ابيض
150غ لوز بقشرتو مطحون مزياااان
150غ زنجلان مطحون مزيان
2معالق كبار نافع
2معالق كبار حبة كلاوة
2معالق كبار قرفة
2حبات مسكة حرة
قبصة ملح
5غ خميرة الحلويات
اصفر بيضة
160غ زبدة مذابة
160غ زيت مخلط بين زيت نباتية و زيت الزيتون لكن زيت النباتية اكثر
ربع كاس عنبة من الخل
180غ ماء الزهر
ضامة الزعفران شعرة و شوية من الزعفران شعرة نخلطوهوم مع ماء الزهر
و ممكن تحتاجو ماء اكثر
طريقة تحضير شباكية مقرمشة و معلكة :
النغربلو المواد الجافة كلها و نضيفو الجنجلان و اللوز لي مطحونين مزيان حتى تعلكو او الى بقاو غبرة نغربلوهوم، نخلطو مزيان ثم نضيفو الزبدة و الزيت و نبسبسو الكل مزياااااان عاد نضيفو اصفر بيضة و الخل و ماء الزهر و نعجنو مزياااااان و الى حتاجينا الماء نضيفو ماء عادي (العجينة كتكون قاصحة) ثم نقسمو العجين كويرات انا قسمتها على 9 و غطيتهوم مزيان و نخليوهوم يرتاحو مدة 2 ساعات، ثم نطلقو الكويرات و نشكلوهوم مربع بحال شكل المسمن و نخليوهوم عاود يرتاحة 2 ساعات اخرى، من بعد نطلقو العجين و نشبكو بالشكل و الطريقة لي بغيتو او المعتادة عندكم ، منين نساليو نخليو الشباكية تنشف مزيان ثمنقليوها فزيت سخونة على درجة حرارة متوسطة و نطفيوها فالعسل بارد . و بالصحة و الراحة 😊
