طريقة تحضير معقودة البطاطا

 
طريقة تحضير معقودة البطاطا :

خديت كيلو بطاطا تكون شوية صغيرة غسلتها وسلقتها بالقشرة ديالها ملي طابت خليتها شوية تبرد قشرتها ومعكتها بفرشيطة ممعكتهاش بزاف

وزت عليها تومة2فصوص و2معالق كبار ربيع قزبر يكون غالب وملحة معلقة صغيرة تحميرة ونصف ملعقة كمون وقليل من ابزار ونصف ملعقة صغيرة خرقوم

خلط كلشي بيدي وخليتها على جنب

وخديت زلافة دقيق فورص معلقة صغيرة خميرة الخبز ملح نصف ملعقة صغيرة خرقوم
وخلط بماء دافي

خاص يكون خليط تقيل شوية على بغرير وخليتو يخمر مزيان

وخدي مقلة درت فيها زيت تسخن وشكلت كويرات من بطاطة وبسطهم شوية على شكل اقراس ودوزتهم فخليط دقيق بعد ما خمر ونهز بفرشيط ونحط في زيت ساخن

خاص تكون بطاطا كلها مغلفة بديك خلطة باش متفرتتش في مقلة ونستمر حتى نسالي بصحة وراحة

سلطة الارز…🍚🍚🌽🌽.سلقت روز عادي وصفيتو خليتو يبرد تم ضفت ليه تونة وذرة وملعقتين كبار مايونيز شوية ابزار ملح وملعقتين خل خلط كل وخليتها في ثلاجة الى حين تقديم