تحضيرات رمضان 2021 على موقع بسمة

تحضيرات رمضان 2021 على موقع بسمة

اولا مقادير و طريقة تحضير ورقة البسطيلة في الدار :
ورقة غزالة بمقادير وطريقة سهلة بزااف صاوبت بيها اليوم بسيطلات صغار و سيكار

المقادير:
6الكيسان تالدقيق
6الكيسان تالماء بارد
شوية الملح
ملعقة كبيرة زيت

كنعملو كلشي فالخلاط الكهربائي كيكون الخليط اتقل من البغرير

كنخليوه يرتاح نصف ساعة ونبداو نطيبوها

نأخد شيتة تالصباغة نعملوها فالخليط ونسوسوها شوية ونمرروها فمقلة سخونة مرة وزوج حتى نسدو التقب كاملة حتى نغطيو لمقلة نعملوها وهي على نار مهيلة شوية من بعد منكونو مسحناها بشوية الزيت بكاغيط غير فالمرة الاولى من بعد نخدمو عادي

نحيدو الورقة ملي كيبانو الجوانب كيتقلعو وندهنوها بالزيت
ونبقاو مستمرين حتى نكملو نفرشو زيف نقي نعملو فوق منو الورقة منغطيوهاش باش متتنداش لينا نخدمو بيها فساعتها
كتجي غزالة شهوة منها

مقادير بسيطلات بهاد الورقة :
تالدجاج واللوز:

أطراف من الدجاج
ملح
ابزار
خرقوم
سكنجبير
زعفران حر
ضامة الزعفران
قرفة
بسيبيسة وقعقلة(عطرية تالدجاح)
ثوم
قزبر ومعدونس
زيت الزيتون زيت عادية
نشرملو المكونات اعلاه مع الدجاج مع بصلة مشلظة ونعملوه يتحمر مزيان
تم نضيف البصل اربع بصلات كبااار مقطعين نرويو بشوية الماء
ملي يطيب الدجاج نحيدوه ونفرتتو
تم نضيف للمرق ملعقة كبيرة قرفة وملعقة سكر ونخليوه حتى يعقاد
عاد نضيفو البيض مع التحراك حتى يطيب
ونعملوه يتصفى
نعملو اللوز مقشر ومحمر ومطحون مهرمش سكر قرفة ماء الزهر
نخلطو الدجاج والبصل المعلك مع البيض واللوز
ونعمرو البسيطلات الصغار

بالنسبة للسيكار بالدجاج و الحوت الابيض :

سمك ابيض مقطع قطع صغيرة مشحر فشوية الزبدة
دجاج مقطع مشحر فشوية الزبدة والزيت تم نضيف لهم مع التخلاط فوق نار هادئة👇🏻👇🏻👇🏻
عطرية السمك
توم بودرة
بصل بودرة
هريسة
ابزار خرقوم سكنجبير ملح
صلصة الصوجا صلصة السمك
عطرية ميكسيكان(او ساشي ديال بامي)
بورو مقطع رقيق ومشحر فشوية زبدة وزيت
خيزو مبشور ومشحر
فلافل ملونة مقطعة على شكل طولي مشحرة
شومبنيون مقطع ومشحر
شومبنيون اسود مرقد في ماء مغلي
شعرية صينية مرقدة فماء مغلي مصفي وننسموها بقطرات من صلصة السمك
قزبر ومعدنوس
عندما نمزج الخليط كله مع بعض في انية كبيرة نتركه فوق نار هادئة ودائما مع التخلاط حتى يتشرب مزيان ويتنسم مزيان عاد نعملوه فكسكاس باش يقطر باش متفزكش لينا الورقة ديالنا وتنجح معانا الوصفة