مقادير عجين مسمن بالزعتر
ناخد زلافة دقيق فينو 2 زلايف دقيق فورص م ص سنيدة ملح والماء للعجن نجمعو العجين ونخليوها ترتاح في كيس مدهون بالزيت مدة ساعة العجين كيولي بحال لي مدلوك
ونعمل كويرات انا هاد العبار عطاني 22 حبة وندهنوهم بالزيت ونغطيوهم بميكة باش يعطيوني الطوع منين نسرحهم
نوجد زلافة فيها زبدة بوماد وشوية الزيت وزلافة فيها دقيق فينو وزلافة فيها الزعتر
ناخد الكورة نطلقها بالزيت والزبدة ونرشها بالزعتر ودقيق فينو ونربعهم ونعمل وحدة في وسط وحدة باش تعطينا 2 في وحدة وحتى نكملو الكمية ديال العجين ونقرصوهم ونشعلو المقلة حتى تصخن ونقصو عليها النار مهيلة ونطيبوهم ( ملاحظة انا كنرش زبدة وزيت غير مرة الأولى وغير كنحطها شوية بسرعة تقلبوها ونتوما كتحركو فيها باش تنفخ ) العجين بدون خميرة الخبز انا هنا درت نصف فيه الزعتر ونصف تاني بدون كيجيو كيدوبو في الفم وبصحتكم وراحتكم
