السلام عليكم و رحمة الله و بركاته
موقع بسمة لكل ما يهم المرأة العربية يقدم الدجاج بالبطاطا ديال العش
الدجاج بالبطاطا ديال العش
المقادير و الطريقة من الاخت المغرب وطني جزاها الله عنا كل خير
ليوم عملت دجاجة على قد الحال وقلت نشاركم طريقتي فتحضيرها واي انتقاد او استفسار انا تحت الخدمة
اولا غسلتها مزيان وسقطرتها وعملت شرمولة بيتها فيها
ابزار سكنجبير توم ملح خرقوم بلدي زيت بلدية شرملتها بيها وغطيتها ودخلتها للتلاجة حتى للصبح
فالغد قطعت البصلة مزيان +الربيع +التوم +العطرية اللي دكرت سابقا هادشي اللي كنعمل +2عويدات قرفة وضعت الدجاجة فوق هاد الششرمولة وخليتها تتقلى شوية مع التحراك مرة مرة غير شفتها تشحرات خويت عليها الماء سخون وتركتها طيب على نار مهيلة بلا منسد عليها وضعت الغطاء غير من الفوق غير قربت طيب عملت ضامة البنة ديال الزعفران +شوية سمينة
للاشارة مكانش متوفر عندي الحامض مرقد والزيتون ههه الغربة علماتني نقضي بالموجود
ووجدت البطاطا ديال العش اللي عزيزة عندي خديتها من عند الواليدة ودغيا كتوجد ههه
حكيت البطاطا بالحكاكة الغليضة +ملح ابزار وبيضة خلطتها وبديت نهزها عشوائيا ونوضعها فوق زيت سخونة
معنديش مع المقلة لكن مفيها باس مرة مرة هههه
و بالصحة و الراحة
